Ramzan Mubarak Ki Fazeelat aur Amaal – Roze Ki Ahmiyat Aur Barkat
Ramadan Mubarak ek azeem aur muqaddas mahina hai jo Allah Ta’ala ki rehmat, maghfirat aur dozakh se nijaat ka paigham laata hai. Yeh mahina sirf roza rakhne ka nahi, balki apni zindagi ko behtar banane, apni ruhani halat sudharne aur Allah ki qurbat hasil karne ka ek behtareen moqa hai.
Ramzan Ki Fazilat Ahadees Ki Roshni Mein
Jannat Ke Darwaze Khul Jate Hain:
Nabi Kareem ﷺ ne farmaya:
“Jab Ramzan ki pehli raat hoti hai, to shayateen aur sar-kash jinn qaid kar diye jate hain, jahanum ke darwaze band kar diye jate hain, aur jannat ke darwaze khol diye jate hain.” (Bukhari, Muslim)
Yeh mahina sirf aik maheena nahi, balki aik aisi naimat hai jo sirf naseeb walon ko milti hai.
Jo Ramzan Ko Paa kar Bhi Maaf Na Ho, Woh Halaak Hai:
Rasoolullah ﷺ ne farmaya:
“Woh shakhs halaak ho gaya jis ne Ramadan ko pa liya magar apni maghfirat na karwa saka.” (Muslim)
Is hadees se samajh aata hai ke Ramzan ek aisa moqa hai jis me har shakhs apni bakhshish karwa sakta hai. Is liye humein chahiye ke hum is moqe se poora faida uthaein.
Roze Ki Ahmiyat aur Uska Maqsad
Allah Ta’ala ne Quran Majeed mein farmaya:
“Aey imaan walon! Tum par roza farz kiya gaya hai jese tum se pehle logon par farz kiya gaya tha, taake tum taqwa hasil karo.” (Surah Al-Baqarah: 183)
Roza sirf bhooka rehne ka naam nahi, balki ek aisi ibaadat hai jo insaan ke andar taqwa aur parhezgari paida karti hai. Yeh ek tarbiyat hai jo insaan ko gunahon se door rakhti hai.
Roze Ka Badla
Rasoolullah ﷺ ne farmaya:
“Har neki ka ajar dus guna diya jata hai, magar roza sirf Allah ke liye hai aur uska ajar bhi Allah hi dega.” (Bukhari, Muslim)
Roza ek aisi ibaadat hai jo sirf Allah ke liye hoti hai, is liye iska ajar bhi Allah hi deta hai. Jannat mein rozedaron ke liye ek khaas darwaza “Rayyan” rakha gaya hai jisse sirf rozedar guzren ge.
Ramadan Ke Khas Amaal
Rasoolullah ﷺ ne farmaya:
Is mubarak maheene mein humein kuch khaas ibaadat aur naik aamaal zaroor karne chahiye:
- Taraweeh aur Qiyam-ul-Lail: Ramadan ki raaton mein Allah ki ibaadat karna bohot afzal hai.
- Tilawat-e-Quran: Yeh woh mahina hai jisme Quran nazil hua, is liye iski ziyada tilawat karni chahiye.
- Sadaqah aur Khairaat: Garibon aur mohtajon ki madad karna sabse afzal amal hai.
- Itikaf: Aakhri ashray mein masjid mein ibadat karna bohot fazilat rakhta hai.
- Lailatul Qadr: Yeh ek aisi raat hai jo hazaar mahino se behtar hai, is raat ki talaash karni chahiye.
Jaan Boojh Kar Roza Chhodne Ki Waeed
Jo shakhs bila uzr Ramzan Mubarak ka roza chhode, uske liye sakht waeedi baatein hain.
Rasoolullah ﷺ ne farmaya:
“Jisne baghair kisi sharai uzr ke Ramzan ka ek roza chhod diya to woh sari zindagi bhi roze rakhe tab bhi uski qaza nahi ho sakti.” (Abu Dawood, Tirmizi)
Hazrat Jabir bin Abdullah (R.A) se riwayat hai ke Rasoolullah (S.A.W) ne khwab mein kuch logon ko dekha jin ke jabre cheere ja rahe the. Nabi (S.A.W) ne farishton se poocha to unhone bataya ke yeh woh log hain jo roza nahi rakhte the. (Ibn-e-Majah)
Hazrat Ibn-e-Abbas (R.A) farmate hain:
“Jo shakhs Ramzan mein bila uzr ek roza bhi chhode, woh gunaah mein zina aur sharab noshi ke barabar hai.” (Fath-ul-Bari)
Ramzan Mubarak ek sunehri mauqa hai ke hum apni zindagi mein behtari laayein, Allah ki raza ke liye ibaadat mein mashghool hon, bure kaamon se bachen aur zyada se zyada nekiyan kamaayein. Yeh mahina hamare liye nekion ki fasal hai, jise humein zaya nahi karna chahiye. Allah humein Ramzan ki barkaat aur fuyooz se bharpoor faida uthane ki taufeeq ataa farmaye. Ameen.
Other Categories
